John 2
Loklox Epot To Kena
1Melemu at lavantun levenaleng, limixin diga lok leluxa loklox epot to Kena at lenep silok Galili. Nenen ne Iesu bok mo gak lok, 2la ne Iesu eburu mi luvuttadi loklok ka anasa ren bok mo diga sing nedi do diba vot go at loklox epot. 3Se limixin diga in axap levendan vaen, nenen ne Iesu ga lok tin, “Levendan vaen atdi ira xap pam.”4Iesu ga lok tin, “Naga, u noxo tong ase ia mi tavanga xusu ana lox i. Laaleng ti vaxaru kaxat lugugu rak kovisi na vot.”
5Nenen ne Iesu ga lok ti mo luvuttadi gugu, “Mina mumu asu levempanga salai do neni na tong i rinimi.”
6Limixin me Judaia diga ruuna leretere at loklok at lotu atdi mumu logosogos panga, ni lavasuun mun teren la lavanna lempat buxom tuntu mo ga nemen; nedi getgesara diga epovo rin tuntu ka tegepu sangaun kopla tavantun sangaun lenbuxak kidi.
7Iesu ga lok ti lavasaxaruki, “Minantu i na lempat buxom mi laxadan.” La digantu aumsu di mi laxadan.
8La melemu neni ga lok tidi, “Monga minantu ka toxongkadan at nom la mina lok ka i uto at laradi i lok tata leluxa.”
Diga lok ka i uto saparap mo laradi, 9la ni ga in tong pen mo loxongkadan, mo ga vee vaen pam. Ni goxoklen i do na lavaen ga la meva, ketla lavasaxaruki ren digaklen i; kuren la neni ga ro ka mo laradi diga lox aepor i, 10la ga lok tin, “Limixin axap di in lagale lavaen avot la melemu do dira in aleng, nedi dira in ba lavaen i so gamasa, ketla nenu ura lili vam lavaen avukat ise nga mo.”
11Nai lavanga sangsangu avot tinotno ne Iesu ga lox i. Ni ga lox i na ro Kena at lenep silok Galili; neni ga lox asuusu lisisilok teren go, la luvuttadi loklok ka anasa ren diga nuunu ren.
12Melemu at nai, Iesu eburu mi nenen la luvutneton la luvuttadi loklok ka anasa ren digat pas uto Kaprenaum, la diga nemen lixilik go at lentaba levenaleng.
Iesu Ga Beles To Xeneng At Loogu Laplavang
(Mt 21:12-13; Mk 11:15-17; Lu 19:45-46)
13Laaleng ga auret ti leluxa at Lovovolo Pe at leme Judaia, kuren la ne Iesu ga urut uto Jerusalem. 14To xeneng at loogu laplavang neni ga long lenget ka luvuttadi diga sesep mi laxanbulumaxao, laxasipsip, la levenamno atdi, la luvuttadi loklox ekun pilas bok mo digat kis saparap levengkot lili atdi. 15Iesu ga lok lakpiksa mi luxua, la ga xala su mi nom levempanga mi lavanuet kangkedek atdi boro xeneng basinge loogu laplavang, laxasipsip eburu mi laxanbulumaxao; la ni ga sogo pupukus levengkot lili la ga reeve laxampilas atdi. 16La ni ga lok ti luvuttadi diga sesep mi levenamno xeretna, “Mina lok kepe nom lavapixa uto xamang basinge na loogu. Nemen mita lok loogu at ne Tamak na lok ngan ta loogu sesep.”17Luvuttadi loklok ka anasa ren diga doxoma ka i do Lovoang Kaala ga lok,
‘Labalamu rak ti na loogu ram ne Moroa i lolos aleng la ni lavasuun teren limixin bilinga dinaba sev amer ia.’ a
18Luvuttadi amgomgo at limixin me Judaia diga paase lolos tin keretna, “Una lok tavanga sangsangu xusu ti lox asuusu i rinama do nenu u ruuna lololos kusu ri lox i na.”
19La ne Iesu ga vorang i ridi xeretna, “Do mina ut asi na loogu laplavang, aba vaxaru amlong manga i xeneng at lavantun aleng.”
20Diga sue i, “Uba vaxaru amlong i at lavantun aleng mene kereva? Diga lok na loogu laplavang at lavanuet sangaun mi lavanna maares axap.” 21Ketla ne Iesu xopmen goxo paase mi loogu laplavang, ketla neni ga paase mumu labantuxu ren. 22Melemu at laaleng neni ga roo xat amlong at lanmet, luvuttadi loklok ka anasa ren diga doma amlong ti na levelinga ren. La diga nuunu at Lovoang Kaala la diga nuunu bok ap mo levelinga ne Iesu ga tong i.
Iesu Iklen Limixin Axap
23At laaleng ne Iesu ga nemen to Jerusalem at leluxa at Lovovolo Pe, buaang nedi limixin diga nuunu at laasen teren atla diga ven mo levempanga sangsangu ren. 24Ketla Iesu goxo nuunu atdi mila neni gaklen avukat limixin axap. 25Goxo epovo bok do teta gita re ri ne Iesu mumu loklok at limixin mila neni gaklen levempanga axap ga nemen keneng at lorooro atnedi.
Copyright information for
MMX